Króatískir fjölmiðlar fjalla um miðasölu KSÍ

Króatískir fjölmiðlar fjalla í dag um miðasölu KSÍ á landsleik Íslands og Króata í umspili um sæti á heimsmeistaramótið í Brasilíu sem fram fer á næsta ári.

Miðasalan hófst klukkan fjögur í nótt og var uppselt á leikinn vel fyrir átta um morguninn en Íslendingar hafa margir hverjir tjáð reiði sína í dag þar sem enginn fékk að vita klukkan hvað miðasalan hæfist.

Vitnað er í viðtal við Þórir Hákonarson, framkvæmdarstjóra KSÍ, í íslenskum fjölmiðlum þar sem hann talar um að sambandið hafi vel vitað af gríðarlegri eftirspurn.

Fram kemur á króatísku vefsíðunni að Laugardalsvöllurinn beri í raun 15.000 manns en sökum öryggisástæðna verða aðeins tæplega 10.000 manns á leiknum.

Líklega gerir blaðamaður ytra þá ráð fyrir að fólk standi í stæðum fyrir aftan bæði mörkin og er það með öllu óheimilt á alþjóðlegum leik.

„Ég spilaði leik þann 1. ágúst á Íslandi og þá snjóaði,“ segir Juraj Grizelj, leikmaður Grindavíkur, í samtali við vefsíðuna.

Grizelj er frá Króatíu en hefur verið á mála hjá Grindavík undanfarin misseri.

„Það verður fróðlegt að sjá hvernig þetta verður í nóvember.“

Árið 2004 mættu yfir tuttugu þúsund manns á vináttulandsleik Íslands og Ítalíu en aldrei áður hafa fleiri mætt á leik á Laugardalsvellinum.

Þá var setið þétt og stóð fólk einnig í stæðum fyrir aftan mörkin og í raun í kringum allan völlinn.

Fram kemur á króatísku vefsíðunni að 1000 miðar séu fráteknir fyrir aðdáendur útiliðsins. Leikurinn fer fram þann 15. nóvember.