Túlkaþjónusta heyrnarlausra: Aðeins tímabundin lausn

Sex milljónir króna sem ríkisstjórnin hefur sett í að tryggja túlkaþjónustu fyrir heyrnarlausa í daglegu lífi, leysa vandann aðeins til skamms tíma. Menntamálaráðherra segir framundan að skoða hvernig þjónustunni verði best fyrir komið í framtíðinni.

Eins og Stöð 2 greindi frá í gær hefur ríkisstjórnin samþykkt að hækka framlag til Samskiptamiðstöðvar heyrnarlausra og heyrnarskertra fyrir þetta ár um sex milljónir, til að tryggja túlkaþjónustu við ýmsar athafnir daglegs lífs. Fjármunir sem ætlaðir voru til þessa á árinu kláruðust í byrjun september.

Félag heyrnarlausra lýsti þungum áhyggjum af stöðunni í bréfi til menntamálaráðherra, en þá fengust þau svör að ekki væri hægt að mæta þörf fyrir aukið fjármagn.

Hvað breyttist?

„Í sjálfu sér breyttist ekki neitt. Það var bara staðan að þetta fjármagn var uppurið en það hafði klárast vegna þess að það hafði verið ákveðið að hækka taxtana fyrir túlkaþjónustuna um næstum því helming án þess að það fylgdi fjármagn þeirri ákvörðun. Það voru mistök að mínu mati,“ segir Illugi Gunnarsson, mennta- og menningarmálaráðherra.

Upphæðin kemur inn á fjáraukalögum fyrir þetta ár. „Auðvitað er ekki um stórar fjárhæðir að ræða, sem hafa markandi áhrif á stöðu ríkissjóðs, en það er þó svo að samanlagt mynda margar tölur eina stóra,“ segir Illugi.

Vandinn hefur aðeins verið leystur til skamms tíma en nefndarvinna er hafin til að meta þjónustuna heildstætt. „Við erum búin að bregðast við þessum vanda sem kom upp núna, framundan er þá að horfa á framtíðina, hvernig þessari þjónustu verður best fyrir komið,“ segir hann.

Heiðdís Dögg Eiríksdóttir, formaður Félags heyrnarlausra, segir að nú verði heyrnarlausir aftur fullvirkir þátttakendur í samfélaginu. „Við getum tekið þátt í lífi barnanna okkar, við getum sinnt okkar skyldum,  mætt á fundi, greitt skuldir og tekið þátt í ýmsu í þjóðfélaginu,“ segir hún.

Heiðdís segir mikilvægt að finna framtíðarlausn, ekki síst hvað varðar túlkun vegna atvinnuþátttöku og símatúlkun. „Þetta er búið að vera erfiður tími. Margir hafa misst af mjög miklu undanfarið.“