Hjörtur leikur ekki með Víkingum í efstu deild

„Ég er ekki á neinu framfaraskeiði á milli ára. Á meðan ég get eitthvað þá reyni ég að hanga í þessu,“ segir Hjörtur Júlíus Hjartarson, sóknarmaður Víkings í Reykjavík.

Fossvogsklúbburinn tryggði sér sæti í deild þeirra bestu í lygilegri lokaumferð 1. deildar karla um helgina. Lokaumferðin var í takt við gang mála í deildinni í allt sumar þar sem Víkingar töldu sig ítrekað hafa glutrað niður möguleikanum að fara upp.

„Þetta fór illa af stað hjá okkur. Við gerðum bara jafntefli heima og gekk erfiðlega að landa sigrum þar,“ segir Hjörtur. Ótrúlegur árangur liðsins á útivelli hélt liðinu þó í efri hluta deildarinnar.

Hjörtur segist hafa þrívegis í sumar hugsað að möguleikinn væri úti. Liðið hafi verið komið á toppinn um mitt mót en aðeins fengið eitt eða tvö stig í sex leikja hrinu.

„Eftir tapið gegn Haukum í 18. umferðinni hélt maður að þetta væri endanlega búið,“ segir Hjörtur. Liðin í toppbaráttunni hafi hins vegar öll tapað óvænt stigum og Grindavík hent frá sér vænu forskoti á toppnum.

Tvö mörk Pape Mamadou Faye á Valbjarnarvellinum gegn Þrótti um helgina tryggði liðinu 2. sætið í deildinni með betri markatölu en Haukar og Grindavík. Munaði miklu um 16-0 sigur á Völsungi í 21. umferðinni.

Hjörtur segir útilokað að hann muni spila með Víkingum í deild þeirra bestu að ári. Úrvalsdeildar-Hjörtur hyggur ekki á endurkomu.

„Hann fór í endanlegt frí frá úrvalsdeildinni um mitt tímabil 2009 þegar ég fór úr Þrótti í Selfoss,“ segir Hjörtur. Hann hafi ekki tíma til að æfa jafnmikið og á þurfi að halda til að spila í efstu deild á sínum aldri.

Hjörtur, sem verður 39 ára í næsta mánuði, segir það ekki einu sinni hafa kitlað hann að láta á það reyna.

„Það kitlaði smá árið 2011 þegar Skaginn fór upp,“ segir Hjörtur sem hefur ekki tekið neina ákvörðun um framhaldið. Hann ætli að æfa og halda sér í formi í vetur. Hann muni taka ákvörðun í framhaldinu.

Hjörtur fagnaði ásamt félögum sínum á lokahófi í Víkinni á laugardag. Hann segir hafa verið gaman að sjá hve miklu máli úrvalsdeildarsætið skipti leikmenn og stuðningsmenn Víkings. Aron Elís Þrándarson sópaði til sín verðlaunum á lokahófinu.

„Það er ósköp eðlilegt. Hann var langbestur í sumar,“ segir Hjörtur.