Jóhann Berg vill fara frá AZ

Landsliðsmaðurinn Jóhann Berg Guðmundsson hefur tilkynnt forráðamönnum hollenska félagsins AZ Alkmaar að hann vilji yfirgefa klúbbinn en þetta kemur fram í Voetbal International í dag en þar er  Earnest Stewart, framkvæmdarstjóra AZ, í viðtali.

Jóhann Berg sló heldur betur í gegn með íslenska landsliðinu í síðustu viku þegar leikmaðurinn skoraði þrennu gegn Sviss ytra í undankeppni HM í knattspyrnu.

Leikmaðurinn leikur nú sitt fjórða tímabil með félaginu en samningur hans við hollenska klúbbinn rennur út næsta sumar. Hann gæti þá farið frítt frá liðinu eða verið seldur í janúar.

„Leikmaðurinn vill breyta til og fara í annað félag,“ sagði Stewart við Voetbal International.