Flugdólgur veittist að lögreglu

Lögreglan á Suðurnesjum handtók í gærkvöldi ölvaðan flugfarþega sem hafði verið til vandræða í flugvél á leið frá Osló. Þurftu tveir vinir hans sem voru í vélinni að halda honum niðri í sætinu við lendingu.

Farþeginn er erlendur karlmaður um fertugt og var óviðræðuhæfur vegna ölvunar þegar lögreglumenn reyndu að ræða við hann um borð í flugvélinni. Veittist maðurinn að einum þeirra og var þá handtekinn, og streittist hann þá á móti.

Maðurinn var færður í lögreglustöð, þar sem hann var látinn sofa úr sér og fer mál hans í hefðbundið ferli.