"Halda í gleðina, það skilar alltaf bestum árangri"

Borgarstjórinn, Jón Gnarr, var meðal þeirra sem til máls tóku á Lundanum í dag og sagði að slagorð Menningarnætur væri Gakktu í bæinn. „Sem hefur tvöfalda merkingu. Annars vegar tilvísun í íslenska gestrisni og hins vegar bókstaflega, sem sagt gakktu í bæinn, ekki keyra í bæinn,“ sagði hann.

Þá flutti Sigurbjörg Þrastardóttir, sem býður upp á ljóðasiglingar á Menningarnótt, ljóð sitt Sæbraut og Dagur B. Eggertsson, formaður borgarráðs, fékk ágæta æfingu fyrir laugardaginn, en þá opnar hann heimili sitt við Óðinsgötu og býður upp á vöfflur.

Hátíðin verður með hefðbundnu sniði fyrir utan flugeldasýninguna. „Flugeldaýningin í ár er dansverk og ber titilinn Eldar, dansverk fyrir þrjú tonn af flugeldum. Ég hef nálgast þetta verkefni nákvæmlega eins og þegar ég sem dansverk en í staðinn fyrir dansara er ég með flugelda og í staðinn fyrir tónlist þá eru sprengingar,“ segir Sigríður Soffía Níelsdóttir, listrænn stjórnandi flugeldasýningarinnar.

Sprengt verður á fjórum stöðum og verður besta útsýnið frá Arnarhóli. Öryggismál verða með hefðbundnum hætti. „Hér verða viðamiklar lokanir sem þýðir að rútína borgarbúa og gesta þeirra verður með öðrum hætti. Við hvetjum fólk til að leggja löglega, nota strætó og koma gangandi í bæinn eða hjólandi og njóta þess sem boðið er upp á,“ segir Stefán Eiríksson, lögreglustjóri á höfuðborgarsvæðinu.

Einhver önnur skilaboð til gesta? „Bara að halda í gleðina, það skilar alltaf bestum árangri,“ segir Stefán.

Framlag Arionbanka til Menningarnætur er Götusýningin 2013 og var hún opnuð í dag. Þetta er stærsta listsýning landsins og sú fyrsta sem fer fram á götuskiltum borgarinnar.

Það verður mikið um að vera á Menningarnótt og óhætt að hlakka til. Svo er hægt að taka forskot á sæluna með því að skoða listaverkin á Götusýningunni.