Össur Skarphéðinsson fyrrverandi utanríkisráðherra segir að það yrði sjúsk og subbuskapur ef utanríkisráðherra slíti aðildarviðræðunum við Evrópusambandið án þess að fá til þess samþykki Alþingis.

Gunnar Bragi Sveinsson utanríkisráðherra kynnti lögfræðiálit í utanríkismálanefnd Alþingis í morgun þar sem segir að núverandi stjórnvöld séu ekki bundin af þingsályktun fyrra þings um aðildarviðræðurnar við Evrópusambandið umfram þingræðisvenjur. Hann væri að íhuga að leysa samninganefnd Íslands og einstaka hópa tengda viðræðunum frá störfum.

Árni Þór Sigurðsson fulltrúi Vinstri grænna í utanríkismálanefnd segir það efnislega þýða að viðræðunum yrði slitið og telur eðilegt að ný þingsályktun verði lögð fram, hyggist ríkisstjórnin slíta viðræðunum.

„Ég tel að það sé eðlilegast og hreinlegast og það er líka hreinlegast upp á samskipti okkar við önnur lönd, í þessu tilviki Evrópusambandið. Það er mikilvægt að samskipti okkar séu hreinskiptin og það sé engum vafa undirorpið á hvaða ferð íslensk stjórnvöld eru,“ segir Árni Þór.

Hann segir rétt að þingsályktunartillögur hafi ekki lagagildi en það séu dæmi um að stjórnvöld vísi í gamlar þingsályktunartillögur. Til að mynda vísi stjórnvöld gjarnan til þingsályktunar um hvalveiðar, þótt komið sé á þriðja áratug frá því sú þingsályktunartillaga var samþykkt.

Össur Skarphéðinsson segir að ef utanríkisráðherra leysi samninganefndina upp sé það yfirlýsing um að hann ætli ekki að standa við eigin orð.

„Hann hafði lýst því yfir opinberlega að það ætti að gera úttekt á stöðunni í Evrópusambandinu og stöðu viðræðna  og leggja það fyrir þingið. Síðan yrðu teknar ákvarðanir í framhaldi af því,“ segir Össur.

Þessi viðhorf hafi Bjarni Benediktsson formaður Sjálfstæðisflokksins ítrekað í vikunni.

„Mér sýnist að þetta sé einhvers konar innri valdabarátta í ríkisstjórninni þar sem að utanríkisráðherrann og reyndar líka sjávarútvegs- og landbúnaðarráðherra eru einbeittir í því að koma umsókninni fyrir kattarnef,“ segir Össur.  Ef samninganefndin verði leyst upp sé í raun búið að slíta viðræðunum.

En væri utanríkisráðherra með því að sniðganga Alþingi, þótt niðurstaðan þar sé nokkuð ljós miðað við þingmeirihluta stjórnarflokkanna?

„Það er sjúsk og subbuskapur ef ráðherrann ætlar í reynd að slíta viðræðum án þess að fá til þess samþykki Alþingis, segir Össur Skarphéðinsson, fyrrverandi utanríkisráðherra.