Segja innanlandsflug leggjast af eftir þrjú ár

Undirskriftasöfnun til stuðnings Reykjavíkurflugvelli í Vatnsmýri er hafin á vefnum "lending.is". Forsvarsmenn hennar segja að stefna núverandi borgarstjórnar Reykjavíkur þýði í raun að innanlandsflug leggist af eftir aðeins þrjú ár og því sé brýnt að þjóðin fái að segja álit sitt.

Félagið Hjartað í Vatnsmýri er á bak við söfnun undirskriftanna en stjórn þess skipa fjórtán einstaklingar víða af landinu, þeirra á meðal Arngrímur Jóhannsson, stofnandi Atlanta, Leifur Magnússon, fyrrum framkvæmdastjóri hjá Flugleiðum, Friðrik Pálsson hótelhaldari og Njáll Trausti Friðbertsson flugumferðarstjóri, en tveir þeir síðastnefndu eru formenn félagsins og kynntu verkefnið á blaðamannafundi í afgreiðslu Flugfélags Íslands á Reykjavíkurflugvelli laust fyrir hádegi.

„Tilgangurinn með söfnuninni er að íslenska þjóðin fái að tjá sig í þessu máli," sagði Njáll Trausti á blaðamannafundinum og bætti við: „Við teljum þetta brýnt málefni, eitt af stærri málefnum líðandi stundar fyrir landið allt." 

Stefnt er að því að undirskriftirnar verði afhentar borgarstjórn Reykjavíkur fyrir 20. september þegar frestur rennur út til að gera athugasemdir við tillögu að nýju aðalskipulagi sem gerir ráð fyrir brotthvarfi flugvallarins. Friðrik Pálsson hótelhaldari segir aðalskipulagsdrögin gera ráð fyrir aðeins einni flugbraut eftir árið 2016:

„Það sem er alvarlegt í þessu máli er að, eins og hefur komið fram hjá flugrekendum, að í rauninni eru bara þrjú ár til stefnu því að árið 2016, gangi þetta eftir sem áætlanir standa til um, þá er í raun innanlandsfluginu lokið hér," sagði Friðrik Pálsson.

Fyrstur til að rita nafn sitt undir áskorunina var Hallgrímur F. Sigurðarson frá Akureyri, sem lenti í alvarlegu slysi á Vaðlaheiði í marsmánuði og skaddaðist ósæð við hjarta. Á blaðamannafundinum lýsti hann því hvernig það hefði orðið sér til lífs að sjúkraflugvél var til taks á Akureyrarflugvelli og að Reykjavíkurflugvöllur hefði verið á sínum stað í Vatnsmýri.