Innlent

"Fengu brauð og skyr í morgunmat"

Hjörtur Hjartarson skrifar

Mikil mildi þykir að ekki fór verr þegar þýsk seglskúta sökk, undan Garðskaga í nótt. 12 voru um borð og var þeim öllum bjargað.
Landhelgisgæslunni barst neyðarkall frá skútunni um klukkan ellefu í gærkvöld sem þá var stödd um 17 mílur vestur af Garðskaga. Leki hafði komið að skútunni og höfðu dælurnar ekki undan.

Þyrla Landhelgisgæslunnar og björgunarskip voru umsvifalaust send á vettvang. Nærstöddum skipum var einnig beint í átt að skútunni og var togarinn Hrafn Sveinbjarnarson GK, fyrstur á vettvang. Ekki gekk í fyrstu að koma fólkinu frá borði vegna sjólags en um tvöleytið tókst koma fólkinu um borð í björgunarskip sem flutti það til Sandgerðis. Gerð var tilraun til að komast í land með skútuna í togi til lands en sjódælan um borð bilaði og sökk skipið skömmu síðar.



Tólf manna hópurinn frá Þýskalandi, fimm fullorðnir og sjö börn á aldrinum 11-15 ára, kom hingað í hjálparstöð Rauða Kross Íslands í Efstaleitinu um klukkan hálfníu í morgun. Þau voru blaut og köld en að öðru leyti í góðu ásigkomulagi.

"Við gáfum þeim bara morgunmat, egg og beikon, brauð og skyr. Smámsaman þá fór þetta allt saman að ganga betur fyrir sig og líta betur út", sagði Hermann Ottóson, framkvæmdastjóri Rauða Krossins.

Skútan var smíðuð fyrir 45 árum og hefur undanfarna áratugi þjónað þýsku skátahreyfingunni. Henni hefur verið siglt um öll heimsins höf með fróðleiksfúsa skáta um borð. Hópurinn sem bjargaðist í gær flaug til Íslands fyrir viku og heldur af landi brott á sunnudaginn. Áætlað var að annar hópur kæmi til landsins í hans stað á sama tíma.

Norbert Kiter, átti að taka skipstjórn skútunnar á sunnudaginn. Hann ræddi við skipverja í dag og segir að þeim líði vel.


Ekki er vitað um orsök þess að leki kom að skútunni en áhöfnin var yfirheyrð af lögreglunni síðdegis.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.