Fjögur íhuga að bjóða sig fram í oddvitasætið

Það stefnir í harðan slag um oddvitasætið hjá sjálfstæðismönnum fyrir borgarstjórnarkosningarnar næsta vor. Fjórir borgarfulltrúar flokksins eru að íhuga að bjóða sig fram í fyrsta sæti ef prófkjörsleiðin verður ofan á.

Opinskátt viðtal Nýs Lífs við Þorbjörgu Helgu Vigfúsdóttur borgarfulltrúa í síðustu viku ollu talsverðu uppnámi meðal félaga hennar í borgarstjórnarflokki Sjálfstæðisflokksins.

Í viðtalinu lýsti hún því yfir að hún væri enn miður sín og að hún skammaðist sín fyrir að tekið þátt í að gera Ólaf F. Magnússon að borgarstjóra í Reykjavík.

Þorbjörg Helga sagði jafnframt að það hefði verið misnotkun á valdi af hálfu borgarfulltrúa Sjálfstæðisflokksins að gera Ólaf að borgarstjóra.

Þá tjáði hún sig um samskipti sín við Gísla Martein Baldursson og Vilhjálm Þ. Vilhjálmsson, fyrrverandi borgarstjóra, en hún lét m.a hafa eftir sér að hún hafi ekki notið stuðnings Vilhjálms og að honum hafi aðallega verið umhugað um eigin vinsældir.

Vilhjálmur Þ. Vilhjálmsson sendi frá sér harðorða yfirlýsingu á fimmtudag þar sem hann furðar sig á ummælum Þorbjargar og talar um aðför hennar að Ólafi F. Magnússyni.

Júlíus Vífill Ingvarsson óskaði eftir fundi með borgarafulltrúum flokksins vegna viðtalsins en samkvæmt upplýsingum fréttastofu hefur þessi formlegi fundur ekki verið haldinn.

Þorbjörg Helga baðst undan viðtali í samtali við fréttastofu, en hún sagðist hins vegar fyllilega standa við það sem fram kæmi í viðtalinu í Nýju Lífi.

Mikil spenna er í loftinu nú þegar fjórir borgarfulltrúar eru að íhuga að gefa kost á sér í fyrsta sætið í prófkjörinu hjá Sjálfstæðisflokknum fyrir borgarstjórnarkosningarnar næsta vor ef prófkjörsleiðin verður ofan á. Þetta eru auk Þorbjargar Helgu þeir Gísli Marteinn Baldursson, Júlíus Vífill Ingvarsson og Kjartan Magnússon.

Haldið hefur verið prófkjör hjá sjálfstæðismönnum fyrir síðustu tvær borgarstjórnarkosningar en ekki hefur verið tekin endanleg ákvörðun um fyrirkomulag við röðun á lista fyrir kosningarnar næsta vor. Ákvörðun er í höndum Varðar, fulltrúaráðs sjálfstæðisfélaganna í Reykjavík.

Óttarr Guðlaugsson, formaður Varðar, sagði í samtali við fréttastofu í dag að umræða um fyrirkomulag við röðun á lista færi fram á vettvangi stjórnar Varðar í ágúst næstkomandi og í kjölfarið myndi fulltrúaráðið koma saman til að taka ákvörðun.