Ísland fyrst til að fullgilda vopnaviðskiptasamning

Ísland hefur fyrst ríkja fullgilt vopnaviðskiptasamning aðildarríkja Sameinuðu þjóðanna. Þetta tilkynnti Gunnar Bragi Sveinsson utanríkisráðherra á opnum fundi með Ban Ki-moon, aðalframkvæmdarstjóra Sameinuðu þjóðanna, í Háskóla Íslands í dag. Eins og fram hefur komið er Ki- moon staddur hér á landi í opinberri heimsókkn í boði utanríkisráðherra.

Vopnaskiptasamningurinn er fyrsti alþjóðlegi samningur sinnar gerðar. Hann fjallar einkum um eftirlit með útflutningi hefðbundinna vopna með það að markmiðið að auka alþjóðlegt öryggi og skapa vernd gegn mannréttindabrotum.

Auk Íslands voru það hin Norðurlöndin sem beittu sér fyrir því að samningurinn yrði gerður, en samningsgerðin naut einnig mikils stuðnings félagasamtaka á borð við Rauða krossinn og Amnesty International. Ríkjunum tókst meðal annars að fá samþykkt ákvæði í samningstexanum sem skyldar aðildarríki SÞ til að taka tillit til hættunnar á kynbundnu ofbeldi þegar ákvarðanir eru teknar um vopnaútflutning.

Gunnar Bragi sagði þetta vera til marks um að ekki þurfi stórveldi til að ná árangri í baráttunni fyrir mannréttindum. Rödd Íslands og annarra sem berðust fyrir góðum málstað hefði skilað sér í þessum samningi.