"Forvitnilegt að heyra hvað hann hefur að segja“

Ban Ki-moon, aðalframkvæmdastjóri Sameinuðu þjóðanna mun halda opinn fyrirlestur  í Hátíðasal Háskóla Íslands á morgun klukkan 15.00. Fyrirlesturinn ber yfirskriftina Ísland og Sameinuðu þjóðirnar: Sjálfbær framtíð fyrir alla.

„Þetta er ofboðslega háttsettur gestur og það er mikill heiður að fá hann til að halda fyrirlestur. Hlutverk sameinuðu þjóðanna og samtaka af þessum toga verður sífellt brýnna og því verður mjög forvitnilegt að heyra hvað hann hefur að segja,“ segir Magnús Diðrik Baldursson, skrifstofustjóri hjá HÍ og skipuleggjandi ráðstefnunnar.

Á fyrirlestrinum mun Ki-moon fjalla um baráttuna gegn fátækt og hlutverk Sameinuðu þjóðanna við að stuðla að alþjóðafriði og öryggi. Gunnar Bragi Sveinsson utanríkisráðherra flytur ávarp við upphaf fyrirlestrarins og fundarstjóri verður Kristín Ingólfsdóttir, rektor Háskóla Íslands. Viðburðurinn, sem fer fram á ensku, er haldinn á vegum Háskóla Íslands, utanríkisráðuneytisins og Félags Sameinuðu þjóðanna á Íslandi.