Léttist um 50 kg

Svana Jónsdóttir 37 ára þriggja barna móðir og amma öðlaðist nýtt líf eftir að hún ákvað að fara í hjáveituaðgerð í byrjun júní í fyrra. Hún var þunglynd og kvíðin og leið bara mjög illa áður en hún léttist í kjölfar aðgerðarinnar og byrjaði að hreyfa sig.

Þorði ekki að stíga skrefið og fara í aðerðina

„Sko ég var búin að hugsa um þessa aðgerð síðan árið 2006 en þorði aldrei að fara. Ég vissi að ég þurfti að gera eitthvað í mínum málum því ég var búin að reyna allt - að mér fannst og var bara komin með ógeð af sjálfri mér og mér leið bara alls ekki vel. Ég var þunglynd og með ofsakvíða þannig að ég fór inn á Reykjalund í prógram árið 2008 minnir mig og kláraði það en þegar ég gat farið í aðgerðina eftir það þá þorði ég bara alls ekki því ég var ekki búin að heyra mikið um hvernig hjáveituaðgerð færi með fólk eða góðar reynslusögur,“ útskýrir Svana.

Þegar talið berst að þunglyndinu og vanlíðaninni svarar Svana: „Mér leið bara illa. Mér fannst eins og allir horfðu á mig með fyrirlitningarsvip. Bara eins og þegar ég fór í fatabúðir og fleira þá fannst mér allir hugsa: „Þú ert allt of feit fyrir þessi föt" og það átti alltaf við eins og þegar ég var í einhverjum veislum, árshátíðum og svoleiðis samkomum. Sjálfsálitið er svo lítið að maður er einhvernveginn langt inní skelinni. Svo var ég líka komin með allskonar stoðverki um allan líkamann eins og aum hné og liði en það hefur stór lagast eftir þessa aðgerð."

Fékk annað tækifæri

„Ég fékk síðan annað tækifæri síðasta vor og var boðið að fara í aðgerð. Ef ég hefði ekki farið þá kæmist ég sennilega ekki þannig að ég lét vaða. Ég sé sko alls ekki eftir því af því að mér hefur gengið alveg rosalega vel og ekkert vesen komið upp í mínu tilfelli en það eru því miður ekki allir svo heppnir. Ég mæli með þessari aðgerð ef fólk velur sér það því hún hjálpaði mér. Í heildina eru farin 50 kg."

Hjáveituaðgerðin

„Hún er þannig að maður er á fljótandi fæði í þrjár vikur og tvær vikur á maukfæði. Svo ferðu að borða venjulega fæðu eftir þetta tímabil en í rosalega litlu magni og það er enn þannig í dag. Galdurinn er bara að gefa sér góðan tíma í að borða og tyggja matinn vel."

Ég er ekki að fá mér risa marengskökusneið núna

„Svo verður maður bara að prófa sig áfram. Það er ekki allt sem maður getur borðað eftir slíka aðgerð því sumt fer bara ílla í magann. En ég hef ekki lent í neinu slíku en maður verður að sjálfsögðu að passa sig og fara vel eftir öllum leiðbeiningum og lesa á innihaldið, passa kolvetnin og svona. Ég er ekki að fá mér risa marengskökusneið núna eins og ég gerði hérna áður. Ég veit ekki alveg hvernig hún færi með mig í dag," segir hún og hlær.

Hvað með mataræði og hreyfingu. Breyttir þú einhverju í þeim efnum eftir að þú fórst í aðgerðina? „Ég reyni að hreyfa mig reglulega. Ég var í ræktinni í vetur en er meira í útivistinni núna.

Lífið á Facebook - vertu með okkur í sumar!