"Það finnst öllum fyndið þegar kerling skráir sig í svona keppni"

„Það vakti athygli mína að einhverjum skyldi láta sér detta í hug að endurvekja keppni um útlit kvenna árið 2013,“ segir Sigríður Ingibjörg Ingadóttir, þingkona Samfylkingarinnar.

Eins og Vísir greindi frá í gærkvöldi hefur fegurðarsamkeppnin Ungfrú Ísland verið endurvakin eftir árs pásu. Fjölmargir hafa skráð sig í keppnina í morgun enda er ekkert aldurstakmark í keppninni í ár.

Sigríður Ingibjörg er ein af þeim sem hafa skráð sig til leiks, en hún segir að með skráningunni sé hún að mómæla því að keppni sé haldin þar sem konur eru hlutgerðar.

„Mér finnst fegurðarsamkeppnir afskaplega mikið 20. aldar fyrirbæri. Þetta er bara mín leið til að vekja athygli á því hvað þetta er fáranlegt þetta er. Það finnst öllum fyndið þegar svona kerling skráir sig í svona keppni því að hugmyndin um hina þóknanlegu konu er ung og falleg stúlka sem passar inn í ákveðna staðla,“ segir Sigríður Ingibjörg.

„Það eru afskaplega kaldranaleg skilaboð til ungra kvenna að það eigi að endurvekja slíka keppni, þar sem konur eru að hassla sér völl um allt samfélag og berjast fyrir mannréttindum kvenna og karla til að fá vera þau sjálf, og njóta frelsis. Þarna er verið að endurvekja þá hugmynd að það sé hægt að keppa í ytra útliti.“

Ungfrú Ísland verður haldin á Broadway þann 14. september næstkomandi.