Silfur Egils hættir á RÚV

„Þetta eru blendnar tilfinningar en ég held að þetta sé rétt. Ég hef alltaf fylgt hugboðum mínum í þessum efnum,“ segir Egill Helgason sjónvarpsmaður, en þáttur hans Silfur Egils verður ekki á dagskrá Ríkisútvarpsins næsta vetur.

Þátturinn hóf göngu sína á Skjá einum fyrir 14 árum síðan og segir Egill að nú sé þetta komið gott. „Ég nenni ekki að endurtaka mig ár eftir ár, þetta eru orðin fjórtán ár. Metnaður minn stendur til að gera eitthvað annað eftir þennan langa tíma í hádeginu á sunnudögum,“ segir hann.

„Þetta er orðið svolítið endurtekningarsamt og á endanum verður maður orðinn gamall karl talandi við fólk sem er miklu yngra en maður sjálfur og segjandi sömu hlutina aftur og aftur. Þetta er allt gert í góðu samkomulagi og að mínu frumkvæði frekar en hitt,“ segir Egill í samtali við fréttastofu.

Hann segist ekki vita hvort að annar þáttastjórnandi taki við af honum í Silfrinu, en líklega verði einhver þjóðmálaþáttur áfram í Ríkissjónvarpinu.

„Það er langt í frá að ég sé að hætta á RÚV það er frekar að ég sé að fara í verkefni sem mér finnst skemmtilegri. Það verða þættir sem tengjast sögu, ferðaþættir og svo verður reyndar eitthvað þjóðmálatengt meðfram líka,“ segir hann.

Í vetur verða sýndir þættir sem Egill hefur unnið að síðustu mánuði um Vestur-Íslendinga.