England gerði jafntefli í Brasilíu

England og Brasilía skildu jöfn 2-2 í skemmtilegum leik í Brasilíu í kvöld. Öll mörk leiksins voru skoruð í seinni hálfleik þrátt fyrir þunga sókn Brasilíu í fyrri hálfleik.

Fred kom Brasilíu í 1-0 á 57. mínútu þegar hann fylgi vel eftir skoti Hernanes sem fór í slána og út í teiginn þar sem Fred náði góðu skoti í fyrsta sem söng í netinu.

Forskot Brasilíu entist í ellefu mínútur eða allt þar til varamaðurinn Alex Oxlade-Chamberlain skoraði með góðu skoti eftir undirbúning Wayne Rooney.

Wayne Rooney skoraði svo sjálfur glæsilegt mark þegar hann smurði boltann upp í fjær hornið af um 20 metra færi þegar 11 mínútur voru til leiksloka.

Aðeins þremur mínútum síðar jafnaði Paulinho eftir sendingu frá Lucas metin fyrir heimamenn og þar við sat.