„Hann er að kaupa sér tíma í pólitískum tilgangi“

„Það er engin tilviljun að ráðherra kemur með þetta útspil núna, fimm mínútum fyrir kosningar,“ segir Elías J. Bjarnason, íbúi á Álftanesi, um tilmæli innanríkisráðherra til bæjaryfirvalda í Garðabæ og Vegagerðarinnar um endurskoðun á lagningu nýs Álftanesvegar. „Hann er að kaupa sér tíma í pólitískum tilgangi. Hann veit að uppistaðan af þessu fólki sem mótmælti veginum eru liðsmenn VG.“

Elías, sem komið hefur að bæjarmálum á Álftanesi fyrir Sjálfstæðisflokkinn, segir leiðtoga Hraunavina flokksbundinn VG en samtökin hafa mótmælt vegaframkvæmdunum og segja þær leggja umhverfi Gálgahrauns í hættu.

„Það liggur ljóst fyrir að forystusauðurinn Gunnsteinn Ólafsson er flokksbundinn í VG og var í bæjarmálapólitíkinni á Álftanesi. Hann má auðvitað hafa sínar skoðanir á þessu en fólk er orðið þreytt á því að örfáir einstaklingar geti leikið þennan leik aftur og aftur, að tefja og koma í veg fyrir umbætur í þessu landi.“

Varðar öryggi allra

Elías sendi yfirlýsingu á fjölmiðla fyrir hönd hópsins „Við sem viljum nýjan Álftanesveg“ og segir í yfirlýsingunni að Guðsteinn hafi ítrekað komist upp með rangfærslur og staðreyndavillur í drottningarviðtölum stærstu fjölmiðla landsins. Málið er sagt varða öryggi allra sem leið eiga um veginn, þar með talið forseta Íslands og erlendra gesta hans.

„Þarna hafa orðið mjög alvarleg slys, fyrst og fremst vegna þess hvernig vegurinn er. Það er útilokað að gerðar verði vegbætur á núverandi vegi og þá væri verið að brjóta á þeim sem búa við gamla veginn. Þegar þetta fólk keypti eignir sínar lá það alltaf ljóst fyrir í öllu skipulagi að  gamli vegurinn yrði bara tengivegur inn í hverfið en ekki sú stofnbraut sem hann er í dag. Ef það hefði ekki verið á skipulagi hefði sjálfsagt eitthvað af þessu fólki ekki keypt þarna.“

Elías segir rangt að nýi vegurinn muni liggja í gegn um Gálgahraun, heldur eigi hann að liggja í gegn um Garðahraun. Útspil innanríkisráðherra sé móðgun við vegfarendur um Álftanesveg, og ekki síst við þá sem lent hafa í slysum á veginum.

„Við mótmælum því þeim tilmælum sem ráðherra hefur sent Vegamálastjóra og ljóst að ráðherra er hér að grípa til örþrifaráða nokkrum dögum fyrir kosningar.“