Kæru vegna Álftanesvegar vísað frá

Vegagerðin hefur ákveðið að semja við verktaka um lagningu umdeilds Álftanesvegar um Gálgahraun eftir að úrskurðarnefnd umhverfis- og auðlindamála vísaði frá kæru nokkurra íbúa við hraunið.

Verkið var raunar fyrst boðið út fyrir fimm árum en var þá slegið af vegna hrunsins. Síðastliðið sumar fór Vegagerðin aftur af stað með útboð, með þeim rökum að umferðaröryggi kallaði á nýjan veg út á Álftanes, opnaði tilboð í haust, en síðan hafa tvö óskyld kærumál frestað framkvæmdum. Annarsvegar vegna verktaka en hins vegar frá íbúum í hverfi því sem næst liggur, sem töldu að framkvæmdaleyfi væri úr gildi fallið. Íbúarnir ásamt samtökunum Hraunavinum stóðu jafnframt fyrir undirskriftasöfnun og mótmælafundum í haust og bentu á að vernda þyrfti hraunið sem meistari Kjarval hafði sem fyrirmynd.

Úrskurðarnefnd umhverfis- og auðlindamála hefur nú vísað kæru íbúanna frá, og telur þá ekki eiga lögvarða hagsmuni þar sem lóðum þeirra var úthlutað eftir að fyrir lágu upplýsingar um lagningu vegarins. Þá hafi bæjarstjórn Garðabæjar ítrekað að framkvæmdaleyfi sé í gildi og fyrir liggi umhverfismat sem ráðherra hafi staðfest.

Frá Vegagerðinni fengust þær upplýsingar í dag að vegna frávísunar úrskurðarnefndar umhverfis- og auðlindamála, og þar sem kærunefnd útboðsmála hefði úrskurðað lægsta boð ógilt, hefði verið ákveðið að hefja viðræður við ÍAV, sem átti næstlægsta boð, upp á nærri 800 milljónir króna, og væri áformað að bindandi samningur yrði undirritaður um verkið.

Fulltrúar íbúanna sem kærðu lýsa vonbrigðum en segjast ætla að íhuga næstu skref.