Landsliðskona fór af velli vegna mígrenis

„Ég las einhvers staðar að við værum fimmta feitasta þjóð í heimi. Það er alltaf verið að minnka íþróttakennslu í skólum. Þeir jafnvel farnir að gefa kort í ræktina og nemendur fara þangað á eiginn vegum. Mér finnst aðeins þurfa að staldra við þegar ástandið er svona," segir Sigurður Ragnar Eyjólfsson íþróttafræðingur.

Faðir stúlku sem endaði á spítala eftir þolpróf í skólaleikfimi ætlar sér að útrýma prófunum, svonefndum píptestum, úr skólakerfinu. Faðirinn hélt að stúlkan væri komin með heilablóðfall en um slæmt mígreniskast reyndist að ræða.

„Það getur gerst hvenær sem er og í hvaða íþrótt eða hreyfingu sem er. Og jafnvel ekki við neina hreyfingu. Alveg fyrirvaralaust," segir Sigurður Ragnar um mígrenisköst. Hann telur heldur hart brugðist við ætli faðirinn að beita sér fyrir því að útrýma þrekprófum úr íslenskum grunnskólum.

„Mér finnst ekkert veita af því að hafa þrekpróf þegar rannsóknir sýna að ungmenni á Íslandi hreyfa sig svipað mikið og áttrætt fólk. Hreyfing er alltaf að minnka á meðan tölvuafþreying og slíkt er að aukast," segir Sigurður Ragnar. Fólk hreyfi sig minna en áður sem sé áhyggjuefni fyrir þjóðfélagið í heild sinni.

Sigurður Ragnar veltir fyrir sér þeirri pælingu að ungmenni sem standi sig verr í þrekprófum eigi á hættu að verða fyrir einelti.

„En það getur væntanlega gerst með öll próf í skólakerfinu. Hvort sem það er enska, stærðfræði, íþróttir eða annað. Ætlum við þá að banna öll próf?" segir Sigurður.

Sigurður Ragnar viðurkennir að hafa ekki sett sig sérstaklega inn í einkunnakerfi í grunnskólum. Hann sé því ekki viss hvort tilefni sé til þess að tækla íþróttakennslu á annan hátt en bóklegar greinar. Hann veltir þó upp spurningu:

„Færni er mæld í öllum bóklegum greinum. Ensku, stærðfræði, íslensku og hvað er öðruvísi? Vill maður ekki vita hvaða færni maður hefur í sundi og í hverju maður þarf að bæta sig?"

Sigurður Ragnar hefur þjálfað íslenska kvennalandsliðið í knattpspyrnu undanfarin ár. Í landsleik Íslands og Svíþjóðar á dögunum þurfti Mist Edvardsdóttir að yfirgefa völlinn sökum mígreniskasts.

„Eigum við þá að banna henni að spila landsleiki? Ég held við þurfum að horfa á hlutina í víðara samhengi," segir Sigurður Ragnar.