Endaði á spítala eftir píptest

„Það sem mér finnst ámælisvert er að þetta skuli vera notað í grunnskólum. Eftir því sem ég hef kynnt mér þetta betur er þetta mjög erfitt próf," Stefán Hákonarson, faðir ungrar stúlku sem endaði á spítala vegna ofreynslu eftir svokallað píptest. Hann var í viðtali í þættinum Í bítið á Bylgjunni í morgun.

Krakkar í grunnskóla eru látnir taka þetta próf í leikfimi nokkrum sinnum á önn. Það gengur út á að hlaupa 20 metra innan ákveðins tíma. Eftir því sem líður á prófið fá krakkarnir styttri tíma til að hlaupa vegalengdina. Krakkarnir hlaupa þar til þeir geta ekki meir, og fá hærri einkunn því lengur sem þeir hlaupa.

Dóttir Stefáns fór í slíkt próf á dögunum, rétt eins og allir aðrir nemendur í flestum grunnskólum landsins.

„Dóttir mín er keppnismanneskja og keyrði sig algjörlega út. Hún var ein eftir af stelpunum, sem hvöttu hana áfram. Síðan fékk hún góða einkunn, sem mér finnst ekki skipta neinu máli, en endaði upp á spítala. Þegar það er hringt í okkur frá hjúkrunarfræðingi skólans og við beðin um að sækja hana, þá var hún ólík sjálfri sér. Gat ekki talað, var með sjóntruflanir, gríðarlegan höfuðverk og leið mjög illa. Við náðum engu sambandi við hana, það var ekkert annað hjá okkur að gera en að keyra upp á Borgarspítala með hana," segir Stefán.

Þar var hún allan daginn í rannsóknum, en fékk að fara heim klukkan 22 um kvöldið. „Niðurstaðan var sú að þetta píptest, þessi mikla áreynsla, hefði framkallað í henni undirliggjandi hugsanlegt mígreni," segir Stefán.

„Ég mun gera allt til að koma þessu út úr námskrá. Læknar og hjúkrunarfræðingar sögðu við okkur: Já er þetta eitt píptest. Þetta er þekkt dæmi. Einn af þessum sérfræðingum, sagði við okkur: Það er líka hinn vinkillinn á þessu, það eru þeir sem eru ekki fit. Krakkar sem eru ekki í neinni þjálfun, fara í þetta próf og þau kannski komast eina eða tvær ferðir, þá er komið ákveðin ástæða til eineltis því við vitum hvernig krakkar eru," segir hann.

Stefán segist einnig hafa rætt við íþróttafræðing og hefur eftir honum: „Það er fráleitt að nota þetta próf til einkunnargjafar. Um er að ræða hámarkspróf, til að mæla hámarkssúrefnisupptöku eða finna út svokallaða þoltölu hvers og eins. Prófið er því einstaklingsmiðað og allur samburður er fráleiddur. Enginn ætti að fara í hámarkspróf fyrr en eftir góða þjálfun, það þarf líka góða upphitun og andlegan undirbúning," hefur Stefán eftir íþróttafræðing.

Viðtalið við Stefán má hlusta á í meðfylgjandi hljóðbroti.