Að óbreyttu fá nýútskrifaðir lögreglumenn ekki vinnu

Á annan tug lögreglumanna, sem útskrifuðust úr lögregluskólanum síðustu jól, fær enga vinnu þar sem niðurskurður síðustu ára hefur fækkað störfum verulega. Tuttugu í viðbót útskrifast næstu jól og sjá þeir heldur ekki fram á að fá vinnu við löggæslu. Formaður Landssambands lögreglumanna hefur áhyggjur af ástandinu.

Um síðustu jól útskrifuðst 20 lögreglumenn úr lögregluskólanum og eru flestir þeirra atvinnulausir þar sem enga vinnu er að fá. Fimm af þeim hafa verið ráðnir tímabundið úti á landi, til að mynda á Ísafirði og Patreksfirði, en einungis tveir hafa verið fastráðnir.

Nýútskrifaðir lögreglumenn sem fréttastofu hefur talað við skilja lítið í þessu og kvarta yfir því að engin svör sé að fá hjá lögreglustjóranum á höfuðborgarsvæðinu. Einn sagði að svörin væru á þá leið að kannski yrði ráðið í sumar - en tíminn sé naumur því margir eru í annarri vinnu sem þyrfti að segja upp með þriggja mánaða fyrirvara.

Til viðbótar eru 20 nemendur við nám í lögregluskólanum sem útskrifast um næstu jól. Um áramótin verða því að minnsta kosti rúmlega þrjátíu nýútskrifaðir lögreglumenn sem ekki fá vinnu.

Stefán Eiríksson, lögreglustjóri á höfuðborgarsvæðinu, sagði í samtali við fréttastofu í morgun að skorið hafi verið niður í löggæslu á höfuðborgarsvæðinu um meira en tvo milljarða og það sé megin ástæðan fyrir því að það gangi erfiðlega fyrir lögreglumenn að fá vinnu - bæði á höfuðborgarsvæðinu og úti á landi. Lögreglan á höfuðborgarsvæðinu myndi gjarnan vilja ráða fleiri lögreglumenn til starfa - en fjárhagsramminn sé settur á Alþingi og hann sé ekki hærri en raun ber vitni.

Snorri Magnússon, formaður Landssambands lögreglumanna, segir að sambandið hafi áhyggjur af þessu ástandi sem hafi verið frá efnahagshruninu árið 2008. Þeir sem útskrifast eigi ekki von á því að fá vinnu.

„Að óbreyttri stöðunni, eins og hún er í dag, þá eiga þeir von á því en það eru alltaf að fara út menn sem er að hætta störfum vegna aldurs."

Þá segir hann að það sé staðreynd að það vanti lögreglumenn á Íslandi. Frá árinu 2007 hafi lögreglumönnum fækkað um áttatíu og einn.

„Sem er ekki lítið, í ekki stærra lögregluliði. Það er hlustað, svo verður spurning um efndir eftir kosningar. Það er sátt um stöðuna, hún er svona, það þarf ekki að vera þrátta neitt um það. Það vantar lögreglumenn og fjármuni í rekstur í lögreglu, til að ráða lögreglumenn - það liggur fyrir. Nú er bara spurning hvernig unnið verður áfram með það, það verður þá væntanlega næsta ríkisstjórn og næstu stjórnvöld, sem þurfa að taka á því."

Hvernig verður þetta á næstu árum? Mun lögregluskólinn taka inn 20 nemendur á hverju ári sem þurfa að bíða eftir frekara fjármagni til þess að fá vinnu?

„Lögregluskólinn er rekinn sem sér stofnun á fjárlögum og hann heldur áfram. Við viljum ekki lenda í þeirri stöðu sem kom upp hérna árið 2001, þegar þurfti að hraðkeyra tvöfaldan, jafnvel þrefaldan, árgang í gegnum skólann vegna þeirrar vöntunar sem var orðin á lögreglumönnum. Það er ljóst að lögreglumenn munu hætta störfum og fara á eftirlaun. Það þarf að ráða fólk í þeirra stað. Það er sú vöntun sem er vituð fram í tímann," segir hann.

„Við höfum líka bent á það að sú staða gæti komið upp eins og árið 2007, þegar allt var í blóma og bullandi uppgangi, að lögreglumenn voru að fara umvörpum úr liðinu í önnur og betur launuð störf. Það er eitthvað sem ég óttast muni gerast þegar við förum að rétta úr kútnum, sem vonandi verður fyrr en seinna eftir þetta blessaða hrun," segir Snorri.