Heppnin ekki með FH í lottóinu

Stuðningsmenn kýpverska liðsins APOEL fögnuðu í morgun þegar félagið datt í lukkupottinn og hreppti lausa sætið í riðlakeppni Evrópudeildarinnar í knattspyrnu í vetur.

Tyrkneska félagið Fenerbahce var á dögunum dæmt í tveggja ára keppnisbann frá Evrópukeppnum. Félagið er sakað um að hafa reynt að hagræða úrslitum í leikjum sínum. Liðið var eitt þeirra 48 sem höfðu tryggt sæti sitt í riðlakeppni Evrópudeildar og því losnaði eitt sæti.

31 lið féll úr keppni í umspilinu í gærkvöldi og var dregið um hvert þeirra liða myndu taka sæti Fenerbahce. FH, sem beið lægri hlut 5-2 gegn Genk í gærkvöldi og samanlagt 7-2, var í pottinum. Kýpverjarnir höfðu heppnina með sér að þessu sinni.

Dregið verður í riðlakeppni Evrópudeildarinnar í dag klukkan 11. 48 lið eru í pottinum og verða riðlarnir því tólf.