Sífellt fleiri skilja bílinn eftir heima

„Þetta sparar fullt af útgjöldum," segir Kristín Þórðardóttir, starfsmaður hjá Advania. Hún skrifaði undir samgöngusamning við fyrirtækið, fær styrk frá því og skuldbindur sig í staðinn til að notast við annan samgöngumáta til að fara til vinnu, svo sem gangandi, hjólandi eða í strætó, að minnsta kosti þrisvar í viku.

„Við eigum ekki einu sinni bíl. Við erum nýflutt frá Danmörku og héldum bara áfram að hjóla þegar við komum heim. Það var óvænt ánægja að fyrirtækið skyldi bjóða upp á þetta," segir Kristín, en um 230 af 600 starfsmönnum hafa undirritað samgöngusamning hjá Advania.

„Ég hjóla nú ekki alveg í öllum veðrum. Ef veðrið er of vont þá tek ég bara strætó, en ég notaði styrkinn til að kaupa strætókort."

Þeim fyrirtækjum og stofnunum sem bjóða starfsmönnum sínum samgöngusamninga fer fjölgandi. Landsbankinn hefur gert það síðan árið 2011. Finnur Sveinsson, sérfræðingur í samfélagsábyrgð hjá bankanum, segir að samningarnir hafi mælst vel fyrir.

„Um síðustu áramót höfðu 359 af um 1.300 starfsmönnum skrifað undir samning. Þeir eiga allir rétt á tuttugu þúsund króna niðurgreiðslu á árskorti í strætó, sem og fjörutíu þúsund króna viðbótargreiðslu vegna kostnaðar við vistvænar samgöngur."

Á móti skuldbinda starfsmenn sig til þess að koma aðeins tvo daga á viku í bíl, nema óviðráðanlegar aðstæður kalli á annað, veik börn, tannlæknatími eða eitthvað í þá veru. „Við höfum það þó þannig að ef slíkar aðstæður koma upp greiðum við leigubíl fyrir starfsfólk."

ÁTVR bauð upp á samgöngusamninga í tilraunaskyni frá apríl til september í fyrra. Tilraunin gekk svo vel að ákveðið var að bjóða upp á framhald á henni.

Sigrún Ósk Sigurðardóttir, aðstoðarforstjóri ÁTVR, segir að starfsmenn geti fengið styrk bæði yfir vetrar- og sumartímann. „Reynslan af þessu er mjög góð og könnun hjá okkur sýndi að starfsmenn eru mjög jákvæðir í garð verkefnisins," segir Sigrún, en 112 af um 300 starfsmönnum hafa skrifað undir samgöngusamning.