Lág stefgjöldin fyrir Thank You

Stefgjöldin sem hljómsveitin Dikta fékk fyrir lagið Thank You í desember voru mun lægri en hún átti von á. Lagið var eitt það vinsælasta árið 2010 og mikið spilað í útvarpinu en það virðist ekki hafa dugað til.

„Þetta var ágætis upphæð en það sem við fengum í vasann var nánast ekki neitt,“ segir trommarinn Jón Þór Sigurðsson, eða Nonni kjuði. „Þetta virðist hafa farið meira og minna í skatt, miðað við það sem við fengum útreiknað á pappírum. Ég veit ekki alveg hvað Steingrímur J. og þetta lið er að krukka. Þetta er orðið hálf hlægilegt.“

Fjórða plata Diktu, Trust Me, kom út fyrir jólin og seldist í um tvö þúsund eintökum samkvæmt Tónlistanum. Síðasta plata sveitarinnar, Get It Together, hefur selst í um tíu þúsund stykkjum síðan hún kom út 2009. Hafa ber í huga að Get It Together seldist í 2.600 eintökum þegar hún kom út fyrir jólin 2009 en seldist svo í yfir sex þúsund eintökum árið 2010 eftir að Thank You sló í gegn.

Dikta lætur ekki lág stefgjöld fyrir Thank You slá sig út af laginu og spilar á sínum fyrstu tónleikum erlendis á árinu í Bryggen í Kaupmannahöfn 4. febrúar. Fleiri tónleikar erlendis verða síðar á árinu, auk þess sem samningar eru í bígerð við þýsku útgáfuna Smarten-Up Records, sem gaf út Get It Together, um að gefa út einnig út Trust Me erlendis. -fb