Toure hetja City í mikilvægum sigri

Yaya Toure skoraði bæði mörk Manchester City í 2-0 sigri liðsins á Newcastle í ensku úrvalsdeildinni í dag. Þar með er liðið enn með frumkvæðið í baráttunni við Manchester United um Englandsmeistaratitilinn.

Mörkin komu bæði í síðari hálfleik og fljótlega eftir að Roberto Mancini, stjóri City, ákvað að skipta Nigel De Jong inn á fyrir Samir Nasri.

Sú skipting bar strax árangur. De Jong átti þátt í uppbyggingu fyrr marksins þegar að City náði loksins að brjóta ísinn. Newcastle setti allt púður í sóknarleikinn og kom síðara markið úr skyndisókn stuttu fyrir leikslok.

City er nú þremur stigum á undan Manchester United sem á leik til góða gegn Swansea klukkan 15.00. City er einnig með betra markahlutfall - tíu mörkum betra - sem þýðir að sigur gegn QPR í lokaumferðinni mun væntanlega duga til að tryggja titilinn.

City vann síðast Englandsmeistaratitilinn árið 1968 og er því biðin orðin ansi löng hjá mörgum stuðningsmönnum liðsins.

Fylgst var með leiknum í beinni lýsingu á Vísi:

Fyrir leik:

Roberto Mancini, stjóri City, stillir upp sama byrjunarliði og í 1-0 sigurleiknum gegn Manchester United á mánudagskvöldið. Carlos Tevez og Sergio Agüero eru því áfram í fremstu víglínu hjá City.

Lið Newcastle er einnig óbreytt frá síðasta leik en liðið vann þá góðan sigur á Chelsea, 2-0. Það þýðir að Cheick Tiote er með frá byrjun þrátt fyrir að hafa verið borinn meiddur af velli í leiknum gegn Chelsea.

Leik lokið: Toure var hetja City sem er nú með þriggja stiga forystu á Manchester United, sem spilar við Swansea síðar í dag.

89. mín - Toure skorar: Eftir að Newcastle sótti nokkuð stíft að marki City komst síðarnefnda liðið í skyndisókn. Þeir voru fjórir gegn tveimur varnarmönnum Newcastle og náði Clichy að koma boltanum á títtnefndan Toure. Hann náði að koma boltanum fyrir sig og skora af stuttu færi. Sigurinn er því tryggður hjá City.

84. mín: Aftur dauðafæri. Toure komst einn í gegn en Krul stöðvaði hann. Agüero náði frákastinu en skaut yfir markið. Sex mínútur eftir af venjulegum leiktíma.

75. mín: Dauðafæri. Silva með frábæra sendingu inn fyrir varnarlínu Newcastle á Agüero. Hann var kominn einn gegn Krul í markinu en hitti ekki markið. Gæti reynst dýrkeypt fyrir þá bláu.

70. mín - Toure skoraði: Þá kom að því. De Jong var með boltann á miðjunni og kom honum á Yaya Toure. Hann spilaði stutt þríhyrningsspil við Sergio Agüero og lét svo vaða að marki. Boltinn söng í netmöskvanum og City komst þar með yfir. Afar, afar mikilvægt mark hjá City.

60. mín: Ekkert mark komið enn í leikinn og 30 mínútur til leiksloka. Stuðningsmenn Manchester United naga neglurnar.

Hálfleikur: Fyrri hálfleik lokið og var hann nokkuð fjörlegur undir lokin. Ekkert mark komið þó enn en fullt af gulum spjöldum hjá dómaranum Howard Webb.

41. mín: Besta færi leiksins. Boltinn barst út í teig þar sem Gareth Barry var einn á auðum sjó. Fyrst komst Coloccini fyrir skotið Barry náði frákastinu sjálfur og skaut aftur að marki. Þá varði Santon á marklínu.

34. mín: Newcastle komst í hættulega sókn. Fyrst varði Gael Clichy frá Demba Ba en Hatem Ben Arfa náði frákastinu og skaut að marki. Joe Hart varði vel frá honum.

18. mín: Engin opin færi í leiknum hingað til. Liðin spila þéttan varnarleik og gefa fá færi á sér. City þó nær því að skapa sér almennileg færi.

1. mín: Leikurinn er hafinn. Hér verður fylgst með því helsta sem gerist í leiknum. Smelltu á Refresh eða ýttu á F5-takkann á lyklaborðinu til að uppfæra lýsinguna.