Hollande og Merkel greinir á um leiðir

Ágreiningur milli Angelu Merkel Þýskalandskanslara og François Hollande Frakklandsforseta setur svip sinn á tveggja daga leiðtogafund Evrópusambandsins, sem hófst í Brussel í gær.

Eins og á undanförnum leiðtogafundum snýst ágreiningurinn um það hvaða leiðir eigi að fara til að styrkja evrusvæðið og koma í veg fyrir alvarlega skuldakreppu í framtíðinni.

Merkel sagðist fyrir fundinn ekki sjá neina ástæðu til að taka stórar ákvarðanir á þessum fundi. Hún vill stefna að því að eftirlit Evrópusambandsins með fjárlagagerð aðildarríkjanna verði stóreflt, þannig að stjórnvöld í Brussel fái jafnvel neitunarvald standist fjárlög einstakra aðildarríkja ekki kröfur bandalagsins. Hollande vildi hins vegar hraða stofnun bankabandalags evruríkjanna með sameiginlegu bankaeftirliti og taldi ekkert standa í vegi fyrir því að af þessu gæti orðið fyrir árslok.

„Eina ákvörðunin sem við þurfum að taka, eða staðfesta, er að koma á fót bankabandalagi fyrir árslok,“ sagði hann. „Fyrsta skrefið er bankaeftirlit.“

Merkel stóð hins vegar fast á því að mikilvægara sé að tryggja gæðin en að hraða ákvörðunum um bankaeftirlitið: „Það er mikið af afar flóknum lagalegum álitamálum, og ég er ekki að gera málið erfiðara en það er,“ sagði hún.

Meðan leiðtogarnir sátu á fundum í Brussel logaði allt í mótmælum á götum Grikklands, þar sem ríkisstjórnarflokkarnir eru enn að reyna að koma sér saman um stórfelldan viðbótarniðurskurð á fjárlögum.

Reikna má með því að brotthvarf Grikklands af evrusvæðinu muni kosta önnur ríki, fyrirtæki og fjárfesta allt að 198 milljarða evra í beinu tapi vegna glataðra skuldabréfa.

Þetta er mat þýsku Bertelsmann-stofnunarinnar, sem telur að þessi kostnaður yrði í sjálfu sér vel viðráðanlegur. Fari hins vegar svo að Portúgal, Spánn og Ítalía fylgi í kjölfarið yrði heildarkostnaður heimsbyggðarinnar vegna samdráttar í heimsframleiðslunni á næstu árum allt að 17.200 milljarðar evra, eða nærri 2.800.000 milljarðar króna.

gudsteinn@frettabladid.is