Sér Pearl Jam þrisvar í júní og safnar grugghúðflúrum

„Eddie Vedder hefur alltaf verið í miklu uppáhaldi hjá mér," segir Benedikt Jón Sigmundsson, 33 ára rafvirki uppalinn á Akranesi.

Hann ætlar að sjá Vedder og félaga í bandarísku rokksveitinni Pearl Jam á þrennum tónleikum á aðeins fjórum dögum í júní næstkomandi. Ekki nóg með það því hann hefur látið húðflúra andlit Vedders á handlegg sinn.

Fyrstu tónleikarnir með Pearl Jam verða í Amsterdam 26. júní og daginn eftir fer Benedikt Jón einnig á aukatónleika rokkaranna þar í borg. Að þeim loknum fer hann til Belgíu á tónlistarhátíðina Rock Werchter í fjórða sinn á ævinni, þar sem Pearl Jam verður eitt af stóru atriðunum.

„Ég er að vona að á þessum tvennu tónleikum í Amsterdam fái maður sitthvora tónleikana enda eru þeir duglegir að breyta lagalistanum," segir Benedikt, sem hefur einu sinni áður séð Pearl Jam spila. Það var á Werchter-hátíðinni fyrir tveimur árum en honum til ama spiluðu þeir ekki slagara á borð við Black, State of Love and Trust og Betterman. Vonast hann til að fá loksins að heyra þau lög „live" í júní.

Auk þess að vera með húðflúr af Vedder á handlegg sínum ætlar Benedikt að bæta fleiri grunge-rokkurum í safnið á sama handlegginn með aðstoð Gunnars Valdimarssonar hjá Íslenzku húðflúrstofunni. Mynd af söngvara Mother Love Bone sem Pearl Jam var stofnuð upp úr, hinum sáluga Andrew Wood, var fyrir skömmu húðflúruð við hliðina á Vedder.

Síðar meir bætast við þeir Chris Cornell úr Soundgarden, rokksveit sem Benedikt sér einmitt á tónleikum í Þýskalandi í byrjun júní og hinn sálugi Layne Staley úr Alice in Chains, sem hann hefur tvívegis séð á tónleikum. Kurt Cobain úr Nirvana átti einnig að vera með í hópnum en hann komst því miður ekki fyrir.

Með húðflúrunum vill Benedikt Jón innsigla grugg-áhugann sinn enda hefur tónlistarstefnan lengi átt fastan sess í tilveru hans.

„Maður ólst upp á grunge-inu. Þetta hefur alltaf verið uppáhaldstónlistin mín og hún er mikið í spilaranum hjá mér."

freyr@frettabladid.is