Fær innblástur frá dótturinni

Andrea Magnúsdóttir er athafnakona vikunnar í Lífinu.

Starf?

Fatahönnuður & eigandi Andrea boutique

Bakgrunnur/menntun?

Stúdentspróf úr FG, förðunarfræðingur og fatahönnuður frá Margrethe-skolen í Kaupmannahöfn.

Lá það alltaf fyrir að fara þessa leiðina í lífinu?

Já, ætli það ekki, einu sinni þegar ég var í framhaldsskóla ætlaði ég að fara í sálfræði eða viðskiptafræði en svo fékk ég overlock-vél í útskriftargjöf og þá varð ekki aftur snúið.

Hvernig gengur að vera fatahönnuður og reka verslun á sama tíma?

Það er í nógu að snúast og okkur leiðist aldrei.

Hvaða strauma munum við sjá í sumar?

Í sumar sjáum við fullt af litum, falleg munstur og skósíða kjóla.

Áttu þér draumaverkefni?

Já, ég á mér alltaf drauma og draumaverkefni. Ég er einmitt að byrja að vinna að einum þeirra núna og stefni á og vona að hann rætist árið 2013.

Hvernig gengur að samtvinna ferilinn og móðurhlutverkið?

Það gengur rosalega vel. Við vinnum mikið saman ég og maðurinn minn og reynum að leyfa börnunum að taka sem mestan þátt í vinnunni okkar. Sonur okkar, sem er 13 ára, fór til að mynda með okkur í síðustu vinnuferð til útlanda sem var frábært. Ég held að það sé bara hollt fyrir börn að sjá hvað foreldrarnir eru að gera og um að gera að leyfa þeim að vera þátttakendur í því eins og hægt er. Svo sit ég oft og teikna með dóttur minni sem er 6 ára, hún er oft með æðislegar hugmyndir að rosalegum kjólum, litavalið hennar er innblástur fyrir mig.

Hvað gerirðu þegar þú ert ekki að vinna?

Þá nýt ég þess að vera með fjölskyldunni. Ég kann sem betur fer að stimpla mig út, fara í frí og njóta þess að vera með fólkinu mínu.

Hvert er þitt mottó í lífinu?

Draumar eru til að láta þá rætast og það er allt hægt.