Bað um íslenska listamenn

Söngkonan Beth Orton fékk tvíeykið Árna & Kinski og Hrafnhildi Hólmgeirsdóttur til að vinna tónlistarmyndband fyrir sig á dögunum.

Leikstjóratvíeykið Árni & Kinski leikstýrði fyrir skömmu nýju myndbandi ensku indí-söngkonunnar Beth Orton. Hún er þekkt fyrir rafskotna þjóðlagatónlist.

Tónlistarmyndbandið er við lagið Magpie sem er væntanlegt á nýrri breiðskífu hennar Sugaring Season í byrjun október og fóru tökur fram í Colorado í Bandaríkjunum. Með þeim vann stílistinn Hrafnhildur Hólmgeirsdóttir. „Stewart, umboðsmaður Beth, hringdi í okkur fyrir tveimur mánuðum,“ segir Stefán Árni sem leikstýrði ásamt Sigga Kinski. Þeir hafa gert fjölda tónlistarmyndbanda, þar á meðal fyrir Snow Patrol, Placebo, Ólöfu Arnalds og Sigur Rós.

Beth þekkti til vinnu þeirra og Hrafnhildar og bað sérstaklega um samstarf. „Ég held satt best að segja að þetta hafi komið frá henni. Það er langbest þegar listamaðurinn velur samstarfsmenn sína. Það byggir upp ákveðið traust og gerir allt auðveldara,“ segir Stefán en Beth hefur listræna stjórn yfir vinnu sinni.

Myndbandið var tekið upp á ótrúlega sjónrænum stað. „Við vorum uppi á The Great Sand Dunes en þar eru risastórar sandöldur.“ Hrafnhildur bætir við að aðstæður hafi verið frekar erfiðar; mikil hæð yfir sjávarmáli og hiti í það minnsta fjörutíu gráður.

Hún sá einnig um klæðnað fyrir komu Beth í þáttinn Late Show með David Letterman en hann var sýndur vestra 15. ágúst. Þar klæddist hún kjól frá Aftur, hönnun Báru Hólmgeirsdóttur, og bar hálsmen frá Kríu, skartgripahönnun Jóhönnu Methúsalemsdóttir. Ekki nægðu þessi íslensku tengsl heldur farðaði Andrea Helgadóttir og Tinna Empera Arlexdóttir annaðist hár. „Í myndbandinu er hún líka í kjól frá Aftur og með hátt í hundrað metra handhnýtt bönd sem mynda sviðsmynd sem ég gerði,“ segir Hrafnhildur og lýsir umstanginu í kringum þáttinn. „Þetta var algjört ævintýri. Svo var fyndið að hafa Lionel Richie í næsta herbergi. Skemmtilegast var þó að vinna fyrir Beth því hún er yndisleg manneskja,“ segir hún og lýsir henni sem ókrýndri drottningu þjóðlagatónlistar.

hallfridur@frettabladid.is