Zlatan með þrennu á fjórtán mínútum

Svíinn Zlatan Ibrahimovic fór mikinn þegar að AC Milan vann Palermo á útivelli, 4-0, í ítölsku úrvalsdeildinni í dag. Hann skoraði fyrstu þrjú mörk leiksins á fjórtán mínútna kafla í fyrri hálfleik.

Thiago Silva skoraði svo fjórða markið í seinni hálfleik en Milan er nú á toppi deildarinnar með 54 stig, fjórum meira en Juventus sem á þó tvo leiki til góða. Juventus mætir einmitt Chievo síðar í kvöld.

Zlatan hefur nú skorað átján mörk í 20 deildarleikjum með AC Milan á tímabilinu.