Ofkældist á Esjunni

"Ég vissi að þyrla væri það eina sem gæti bjargað mér,“ segir íþróttakennarinn Bjarni Stefán Konráðsson sem örmagnaðist á fjöllum í maímánuði á síðasta ári og var mjög hætt kominn vegna ofkælingar. Hann náði að hringja í Neyðarlínuna en gat takmarkaðar upplýsingar gefið um staðsetningu sína.

Þótt aðeins sé liðið eitt og hálft ár frá því atvikið varð hefur síðan orðið til ný tækni sem gerir fólki með snjallsíma kleift að senda Neyðarlínunni nákvæma staðsetningu, nánast upp á metra. Um er að ræða svokallað app en allar nánari upplýsingar má sjá um það hér fyrir neðan.

Ítarlega verður fjallað um leitina að Bjarna í Neyðarlínunni á Stöð 2 í kvöld kl. 20.10 en hér fyrir ofan er stutt sýnishorn úr þættinum. Um 112 appið

112 Iceland er nýtt snjallsímaforrit sem ferðamenn geta notað til að kalla eftir aðstoð vegna slyss eða óhapps. Einnig geta þeir nýtt það til að skilja eftir sig slóð, "brauðmola“, en slíkar upplýsingar geta skipt sköpum ef óttast er um afdrif viðkomandi ferðalanga og leit þarf að fara fram. Ekki er þörf á gagnasambandi til þess að nýta forritið, hefðbundið GSM samband nægir.

112 Iceland er ekki ætlað að leysa önnur öryggistæki á borð við neyðarsenda eða talstöðvar af hólmi. Það er hugsað sem gagnleg viðbót fyrir fjölda fólks er notar snjallsíma og þéttir öryggisnet fjarskipta. Það má einnig nota erlendis en samskiptin fara þó alltaf fram í gegnum númerið 112 á Íslandi. Í slíkum tilvikum hefur Neyðarlínan samband við viðbragðsaðila í viðkomandi landi sem aðstoðar síðan þann einstakling er í hlut á.

Valitor þróaði forritið í samvinnu við hugbúnaðarfyrirtækið Stokk en því er ætlað að auka öryggi ferðamanna hér á landi og þéttir það öryggisnet sem fyrir er í landinu. Samsýn sá um tæknilega útfærslu á birtingu upplýsinga hjá neyðarvörðum. Að verkefninu hafa einnig komið Neyðarlínan, Almannavarnadeild Ríkislögreglustjóra og Slysavarnafélagið Landsbjörg.

Hægt er að sækja forritið fyrir Android síma hér og hér fyrir iPhone. Nánari upplýsingar er að finna hér á heimasíðu 112.