Rokkveisla í Kaplakrika

Stórtónleikarnir Rokkjötnar 2012 verða haldnir í Kaplakrika í september. Bibbi í Skálmöld segir fólk eiga von á fólki á öllum aldri og engu veseni.

„Við förum með alla hátalarana á landinu í alvöru sal. Þannig á þungarokk að vera,“ segir Snæbjörn Ragnarsson, oftast kallaður Bibbi, meðlimur þungarokksveitarinnar Skálmöld.

Skálmöld er ein af átta hljómsveitum sem koma fram á stórtónleikunum Rokkjötnar í Kaplakrika 8. september. Hinar hljómsveitirnar eru ekki síður hressandi: HAM, Sólstafir, Brain Police, The Vintage Caravan, Bootlegs, Endless Dark og Momentum.

Eins og listinn yfir hljómsveitirnar sem koma fram gefur til kynna verður rokkið í þyngri kantinum á tónleikunum. Bibbi hefur verið lengi í tónlistarbransanum og segir ríka þörf á alvöru þungarokktónleikum. „Af hverju í andskotanum er alltaf verið að halda flotta tónleika úti um allt og af hverju erum við ekki að gera þetta? Það er alltaf einhver minnimáttarkennd í þungarokkinu um að enginn komi, en ég neita að trúa því,“ segir Bibbi ákveðinn. „Ég tók með mér góða menn sem ég treysti og veit að geta staðið í svona málum. Með fullri virðingu fyrir Gauknum og Nasa, sem eru frábærir og nauðsynlegir, þá verðum við stundum að gera eitthvað annað en það.“

Tónleikarnir eru haldnir í samstarfi við Tuborg og Jagermeister. Glæsilegri umgjörð er lofað og hljóð- og ljósakerfi verður af stærðargráðu sem fátítt er að prýði slíkar samkomur. Kynslóðabil hljómsveitanna er breitt og Bibbi á von á fólki á öllum aldri. „Það er því miður 18 ára aldurstakmark, en ég á von á fólki 18 ára og upp úr,“ segir hann. „Ef maður heldur rokktónleika þá getur maður verið handviss um að það verði ekkert vesen. Svo heldurðu þjóðhátíð, eða eitthvað djöfulsins poppreif, þá er endalaust af nauðgunum og slagsmálum.“

4.990 krónur kostar inn á tónleikana og miðasala hófst á Midi.is í vikunni.