Þúsundir fylgdu Morosini til grafar

Þúsundir stuðningsmanna ítalska liðsins Livorno mættu í jarðarför knattspyrnumannsins Piermario Morosini en hann var borinn til grafar í dag.

Hinn 25 ára gamli Morosini lést í leik um helgina. Í fyrstu var talið að hann hefði fengið hjartaáfall en nú eru menn ekki vissir.

Rúmlega 10 þúsund manns mættu til kirkjunnar í Bergamo þar sem jarðarförin fór fram. Þrír risaskjáir voru settir upp fyrir utan kirkjuna svo allir gætu fylgst með.

Cesare Prandelli landsliðsþjálfari og forseti ítalska knattspyrnusambandsins ásamt fjölda þekktra leikmanna mættu einnig í jarðarförina.

Mínútuþögn verður fyrir alla leiki á Ítalíu um helgina til heiðurs Morosini.