Lewandowski: Vonandi spilar Pepe heiðarlega

Pólverjinn Robert Lewandowski hjá Dortmund er búinn að kynda bálið fyrir leikinn gegn Real Madrid á miðvikudag. Hann segist nefnilega óttast að portúgalski varnarmaðurinn Pepe muni ekki spila heiðarlega.

"Ég get staðfest að ég óttast ekki varnarmenn Real. Ég veit nákvæmlega hvernig varnarmenn þeir eru. Ég vona bara að Pepe spili heiðarlega. Ef hann gerir það þá verður þetta í lagi," sagði Lewandowski.

Framherjinn ber þó mikla virðingu fyrir liði Madrid þó svo hann virðist ekki bera mikla virðingu fyrir Pepe.

"Það er erfitt að segja hvort það sé erfiðara að mæta Madrid eða Man. City. Þetta er algjört topplið og þetta verður hrikalega erfiður leikur. Það eru margir af bestu mönnum heims í liðinu og þeir eru allir hættulegir. Þetta verður vonandi flottur leikur."