Snarráður vegfarandi bjargaði mannslífi

Snarráður vegfarandi bjargaði að öllum líkindum mannslífi, þegar hann sá bíl á hvolfi ofan í Laxá á Ásum, skammt frá Blönduósi, í gærkvöldi og kom ökumanninum til hjálpar.

Ökumaðurinn var fastur í bílnum en vegfarandinn gat haldið höfði hans upp úr vatninu á meðan beðið var aðstoðar slökkviliðs og lögreglu. Ella hefði hann getað drukknað að sögn lögreglu.

Þegar ökumaðurinn hafði náðst úr bílflakinu var hann fluttur á heilsugæslustöðina á Blönduósi til aðhlynningar og svo áfram á sjúkrahúsið á Akureyri, en mun þó ekki vera alvarlega slasaður.

Ekki liggur fyrir hvað olli því að maðurinn missti stjórn á bílnum.