Algjört kvikmyndaklúður

Ævintýramyndin John Carter er á góðri leið með að verða mesta kvikmyndaklúður allra tíma. Hún kostaði rúma þrjátíu milljarða króna í framleiðslu. Allt stefnir í að ævintýramyndin John Carter verði mesta kvikmyndaklúður allra tíma. Framleiðandinn Disney býst við því að tapa um 200 milljónum dollara á myndinni, eða ríflega 25 milljörðum króna. Myndin kostaði 250 milljónir dollara í framleiðslu, rúma 30 milljarða króna, enda uppfull af rándýrum tæknibrellum.

Myndin, sem gerist á plánetunni Mars og er byggð á sögu Edgar Rice Burroughs, hefur fengið slæma dóma hjá gagnrýnendum. Engu skiptir þótt leikstjórinn sé Andrew Stanton, maðurinn á bak við teiknimyndirnar vinsælu Finding Nemo og Wall-E. Vissulega er þetta fyrsta leikna myndin sem hann leikstýrir en samt kemur á óvart að svo kunnur leikstjóri nái ekki betri árangri.

Engin örugg formúla er fyrir árangri á hvíta tjaldinu en einhverjir tala þó um að bölvun fylgi myndum sem gerast á Mars eða tengjast plánetunni á einhvern hátt. Til dæmis kostaði Disney-myndin, Mars Needs Moms sem kom út í fyrra, 150 milljónir dollara en græddi aðeins 39 millljónir í miðasölunni. Hún er fimmta mesta kvikmyndaklúður sögunnar.

Red Planet, sem gerist á Mars með Carrie-Anne Moss og Val Kilmer í aðalhlutverkum, tapaði sömuleiðis fúlgum fjár eða 82 milljónum dollara. Tvær Disney-myndir til viðbótar sem tengjast Mars, Mission to Mars og My Favourite Martian, töpuðu einnig háum fjárhæðum. Svo virðist sem yfirmenn hjá Disney hafi gert sér grein fyrir þessari mögulegu bölvun þegar þeir framleiddu John Carter, því samkvæmt vefsíðu BBC fjarlægðu þeir „Of Mars“ úr upphaflegum titli myndarinnar. Það kom ekki að sök.

Önnur mynd sem gerist úti í geimnum er „gamanmyndin“ The Adventures of Pluto Nash með Eddie Murphy í aðalhlutverki. Hún kostaði 120 milljónir dollara, eða um fimmtán milljarða króna, en þénaði aðeins sjö.

Nefna má nokkrar myndir til viðbótar sem hafa tapað svakalegum fjárhæðum eins og The Postman og Waterworld með Kevin Costner, Battlefield Earth með John Travolta og Sahara með Matthew McConaughey og Penelope Cruz í aðalhlutverkum. Engin hefur samt enn náð að velta sjóræningjamyndinni Cutthroat Island frá árinu 1995 úr sessi sem mesta klúður allra tíma. Hún tapaði 147 milljónum dollara og komst þar með í Heimsmetabók Guinness. Miðað við yfirlýsingu Disney um John Carter virðist ekki langt í að hún taki við þessum vafasama heiðri af Cutthroat Island.