Wenger: Þetta voru sanngjörn úrslit

Arsenal komst í 0-2 gegn Schalke í Þýskalandi en missti forskotið niður og varð að sætta sig við jafntefli á erfiðum útivelli.

"Þetta var mjög erfiður leikur og vel spilaður hjá báðum liðum. Við fengum mikla gagnrýni eftir leikinn um síðustu helgi og því var mikilvægt að ná góðum leik núna," sagði Arsene Wenger, stjóri Arsenal, eftir leikinn.

"Mér fannst liðið bregðast vel við og sýna karakter. Úrslitin voru sanngjörn þegar upp var staðið. Leikur í Meistaradeildinni er ekki unninn þó svo lið nái 2-0 forskoti."

Theo Walcott, framherji Arsenal, var ekkert sérstaklega ósáttur eftir leikinn.

"Þetta var gott stig hjá okkur á endanum. Það hefði vissulega verið frábært að ná sigri hérna því Schalke er með gríðarlega gott lið," sagði Theo Walcott, leikmaður Arsenal, en hann skoraði fyrsta mark leiksins.

"Við erum að leggja okkur alla fram og reyna að klára leikina. Það er það eina sem við getum gert."

Walcott fékk aldrei þessu vant að vera í byrjunarliði Arsenal. "Ég vil eðlilega spila og því var um að gera að nýta tækifærið. Mér finnst ég eiga það skilið að spila," sagði Walcott en hann hefur meðal annars þurft að vera á bekknum þar sem hann hefur ekki skrifað undir nýjan samning við félagið.

"Þið verðið að spyrja stjórann út í þau mál. Ég get ekki svarað slíkum spurningum."