Stjóri Braga: Ferguson þarf að sýna Nani meiri stuðning

Jose Peseiro, stjóri Braga, segir að Nani þurfi að fá betri stuðning frá stjóra sínum hjá Manchester United til að honum líði vel.

Nani hefur ekki verið upp á sitt besta í haust og hefur ekki verið fastamaður í liði United.

Braga og United mætast í Meistaradeild Evrópu í kvöld en Pesiero var stjóri Sporting Lissabon þegar að Nani lék sinn fyrsta aðalliðsleik með liðinu fyrir sjö árum síðan.

„Leikmenn eru ólíkir. Sumir þurfa mikinn stuðning en aðrir ekki. Enskir leikmenn þurfa þess ekki í miklum mæli en leikmenn frá Portúgal, Brasilíu og Spáni þurfa tilfinningaríkara samband."

„Sir Alex Ferguson getur ekki leyft sér að tala öðruvísi við Nani en aðra leikmenn en sumir leikmenn þurfa meira en aðrir. Nani þarf meira."

„Nani getur betur en hann hefur sýnt. En til þess verður hann að vera ánægður og ég veit að hann er ekki ánægður nema að hann fái að spila reglulega."