Drykkja, dráp og daður í James Bond myndunum

Í tilefni af frumsýningu Skyfall nýjustu myndarinnar um James Bond hefur hagfræðitímaritið The Economist gert létta úttekt á þessum þekktasta njósnara í þjónustu Bretadrottningar.

Fyrirsögnina á þessari úttekt Economist mætti þýða sem drykkja, dráp og daður. Tímaritið setur upp súlurit um frammistöðu Bond í höndum þeirra sex leikara sem farið hafa með hlutverkið. Á súluritinu sést hvað hver þeirra hefur kálað flestum andstæðingum sínum að meðaltali í mynd, drukkið flesta Martíni kokteila og náð að heilla flestar konur.

Pierce Brosnan er sá blóðþyrstasti af öllum Bondunum en hann kálaði að meðaltali 19 af andstæðingum sínum í hverri mynd.

Athygli vekur að George Lazenby var sá sem heillaði flestar konur en þess ber að geta að hann lék aðeins í einni mynd. Þeir Sean Connery og Roger Moore sem léku í flestum Bond myndanna eru í miðjum hópnum í þessari úttekt. Timothy Dalton var hinsvegar rólegasti Bondinn í þessari úttekt.

Daniel Craig núverandi Bond er á toppnum hvað drykkju Martini kokteila varðar en á botninum þegar kemur að fjölda kvenna. Kannski vegna þess hve hann drekkur mikið af Martíni kokteilum. Það vandamál ætti að vera úr sögunni því Heineken hefur séð um að í Skyfall drekkur Bond einnig öl. Gera má ráð fyrir að sá drykkur sé hvorki hristur né hrærður.