Arsenal sótti þrjú stig til Frakklands

Arsenal vann góðan 2-1 sigur á Frakklandsmeisturum Montpellier á útivelli í kvöld í B-riðli Meistaradeildar Evrópu.

Montpellier komst þó yfir snemma leiks með marki úr vítaspyrnu eftir að Thomas Vermaelen hafði brotið heldur klaufalega af sér.

En Arsenal var fljótt að svara fyrir sig með tveimur mörkum með skömmu millibili. Fyrst jafnaði Lukas Podolski metin og Gervinho skoraði svo sigurmark sinna manna eftir snarpa sókn.

Arsenal og Schalke, sem hafði betur gegn Olympiakos á útivelli í kvöld, eru á toppi riðilsins með þrjú stig hvort.