Liverpool ætlar ekki að lána Carroll til Newcastle

Forráðamenn enska úrvalsdeildarliðsins Liverpool ætla ekki að taka tilboði Newcastle í enska landsliðsframherjann Andy Carroll. Newcastle hafði áhuga á að fá fyrrum leikmann liðsins að láni út næstu leiktíð og taka þátt í því að greiða laun leikmannsins sem er með um 16 milljónir kr. í laun á viku eða 80.000 pund.

Carroll er þriðji dýrasti leikmaður ensku úrvalsdeildarinnar frá upphafi en hann var keyptur frá Newcastle á 35 milljónir punda í janúar á síðasta ári.

Hinn 23 ára gamli framherji hefur ekki náð sér á strik með Liverpool frá því hann kom frá Newcastle. Samkvæmt frétt BBC vilja forsvarsmenn Liverpool selja leikmanninn í stað þess að lána hann.