Dara Torres ekki á Ólympíuleikana í sjötta sinn

Dara Torres mun ekki keppa á Ólympíuleikunum í sumar en það varð ljóst eftir að bandaríska úrtökumótinu í sundi lauk um helgina.

Torres hafði keppt á fimm Ólympíuleikum á ferlinum en hún er 45 ára gömul. Hún hafnaði í fjórða sæti í 50 m skriðsundi á úrtökumótinu en það var eina keppnisgrein hennar þar.

Þar með varð ljóst að glæsilegum ferli hennar væri lokið en Torres vann þrenn silfurverðlaun á leikunum í Peking fyrir fjórum árum síðar. Varð hún þá fyrsta sundkonan yfir fertugu til að keppa á Ólympíuleikum.

Torres keppti reyndar ekki á leikunum 1996 og 2004 en þess fyrir utan keppt á öllum leikum síðan 1984. Þá vann hún gull í 4x100 m skriðsundi kvenna með boðssundssveit Bandaríkjanna.

Alls urðu Ólympíugullin fjögur og verðlaunin tólf talsins alls. Hún var aðeins níu hundraðshlutum úr sekúndu frá því að komast í keppnislið Bandaríkjanna að þessu sinni en gengur þó sátt frá sínum ferli.

„Það er erfitt að missa af sætinu með svo litlum mun en ég held að ég hefði engu breytt," sagði hún. „Ég ætla nú að njóta sumarsins, eyða tíma með dóttur minni og hvetja bandaríska liðið áfram."