Mancini dregur í land: Balotelli spilar með City aftur

Roberto Mancini segist reiðubúinn að láta sóknarmanninn Mario Balotelli spila með Manchester City á nýjan leik þrátt fyrir að hafa fengið þrjú rauð spjöld á tímabilinu.

Balotelli fékk rautt í tapleik City gegn Arsenal um helgina og sagði Mancini eftir leikinn að Balotelli væri búinn að vera hjá félaginu. Hann myndi þar að auki líklega selja leikmanninn í sumar.

Balotelli sá eftir öllu og baðst afsökunar. Til allra lukku - fyrir hann - fékk hann þriggja leikja bann en ekki níu leikja eins og raunin hefði orðið hefði enska knattspyrnusambandið ákveðið að refsa honum fyrir tæklingu á Alex Song sem dómari leiksins tók ekki eftir.

„Hann fékk bara þriggja leikja bann og er ég ánægður fyrir hans hönd," sagði Mancini eftir 4-0 sigur sinna manna á West Brom í gær. „Ég hélt að Mario yrði dæmdur í 6-7 leikja bann og þess vegna taldi ég að hann myndi ekki spila aftur á tímabilinu."

„Hann mun því ná leiknum gegn Manchester United. Hann verður tilbúinn þá," sagði Mancini.

Þrátt fyrir að City hafi í gær minnkað forystu United í fimm stig og að liðin eigi eftir að mætast innbyrðis telur Mancini að titilbaráttunni sé lokið þetta tímabilið.

Grannaslagur United og City fer fram mánudaginn 30. apríl næstkomandi.