Fabregas um Messi: Hann er besti leikmaður fótboltasögunnar

Cesc Fabregas lagði upp tvö mörk fyrir Barcelona í kvöld þegar liðið niðurlægði þýska liðið Bayer Leverkusen með því að vinna 7-1 sigur í seinni leik liðanna í 16 liða úrslitum Meistaradeildarinnar. Maður kvöldsins var þó Lionel Messi sem skoraði fimm af sjö mörk Barcelona-liðsins.

„Það er hægt að búast við öllu þegar Lionel Messi er inn á vellinum. Hann er besti leikmaður fótboltasögunnar og við höfum aldrei séð leikmann eins og hann," sagði Cesc Fabregas eftir leikinn í kvöld.

„Hann kom ferskur inn eftir leikbannið um helgina og við erum mjög ánægðir með að hafa hann í okkar liði. Við höfum líka menn eins og Xavi og Iniesta. Við erum því með fleiri menn sem eru bestir í heiminum í sinni stöðu. Við höfum svo marga möguleika," sagði Fabregas kátur.