Daniel Alves: Við erum ekkert án Guardiola

Daniel Alves, brasilíski varnarmaðurinn hjá Barcelona, hefur bæst í hóp þeirra sem pressa á þjálfarann Pep Guardiola að skrifa undir nýjan samning við félagið. Alves býst við að Guardiola skrifi undir nýjan samning en Pep skrifaði undir eins árs samning á svipuðum tíma á síðasta ári.

„Við erum ekkert án hans og ef hann fer þá getum við búist við niðursveiflu hjá Barca," sagði Daniel Alves sem hefur leikið með Barca frá 2008 og þekkir því ekki annað en að spila fyrir Guardiola.

„Hann veit hversu mikilvægur hann er fyrir okkur og það væru frábærar fréttir fyrir Real Madrid ef Guardiola myndi hætta með Barcelona-liðið," sagði Daniel Alves.

Barcelona hefur unnið 13 af 16 mögulegum titlum undir stjórn Pep Guardiola en það er langsótt að liðið vinni spænska meistaratitilinn fjórða árið í röð enda tíu stigum á eftir toppliði Real Madrid.