Lyon náði bara að skora eitt framhjá varnarmúr APOEL

Alexandre Lacazette tryggði franska liðinu Lyon 1-0 sigur á APOEL Nicosia frá Kýpur í fyrri leik liðanna í sextán liða úrslitum Meistaradeildarinnar í kvöld en þessi úrslit þýða að Kýpurmennirnir eiga enn ágæta möguleika á því að komast í átta liða úrslitin.

Sigurmark Alexandre Lacazette kom á 58. mínútu leiksins en skot hans fór þá af varnarmanni og yfir markvörð APOEL Nicosia og í markið.

APOEL Nicosia kom öllum á óvörum með því að vinna sinn riðil og verða fyrsta félagið frá Kýpur sem kemst í sextán liða úrslit Meistaradeildarinnar. Varnarmúr liðsins var þéttur en liðið hafði ekki heppnina með sér í sigurmarkinu.

Seinni leikur liðanna fer fram á Kýpur 7. mars.