Lögreglustjórinn vill ekki símhleranir til lögreglunnar

Lögreglustjórinn á höfuðborgarsvæðinu hafnar þeirri hugmynd að framkvæmd símhlerana vegna rannsókna sakamála verði alfarið flutt til lögreglunnar. Innanríkisráðherra segir málið tekið til athugunar.

Stefán Eiríksson, lögreglustjóri á höfuðborgarsvæðinu, kveðst ekki telja það eðlilegt að öll framkvæmd símhlerana vegna rannsókna sakamála sé færð frá fjarskiptafyrirtækjunum til lögreglu. Ögmundur Jónasson innanríkisráðherra er hlynntur því að framkvæmdin sé flutt frá símafyrirtækjunum.

Fréttablaðið greindi frá því í gær að Sævar Freyr Þráinsson, forstjóri Símans hf., hefði komið þeirri ósk á framfæri við innanríkisráðuneytið og Póst- og símamálastofnun að starfsmenn fjarskiptafyrirtækjanna yrðu losaðir undan því að annast tengingar þegar símhlerunum er beitt við brotarannsóknir. Lögregla tæki við þeirri framkvæmd.

„Mér líst mjög vel á tillögur þess efnis að það séu ekki fyrirtæki úti í bæ sem sinni þessu mikilvæga en viðkvæma verkefni við rannsóknir sakamála,“ segir Stefán. „En ég tel eðlilegt að einhver annar opinber aðili en lögregla annist þessar tengingar. Það er ekki eðlilegt að lögreglan afli úrskurða og sjái um framkvæmdina frá upphafi til enda. Þá þyrfti að efla og bæta eftirlitið með þessari starfsemi til muna til þess að um þetta ríki það traust sem nauðsynlegt er að sé til staðar.“

Spurður hvaða kosti aðra hann sjái fyrir sér í stöðunni bendir Stefán á að Póst- og fjarskiptastofnun sé ríkisstofnun og geti þá borið ábyrgð á framkvæmdinni og eftir atvikum falið einhverjum innan vébanda ríkisins að annast tengingarnar.

„Mér finnst þetta fullkomlega eðlileg ósk og nokkuð sem við hljótum að taka til athugunar,“ segir Ögmundur. „Þetta var eitt af því sem menn horfðu til þegar Síminn var markaðsvæddur á sínum tíma, að ýmsar kvaðir væru fyrir hendi sem fylgdu með fyrirtæki á borð við Landsímann, og ein af þeim var þetta. Lögreglan hefur lengi lýst áhyggjum af þessu og sagt að þarna væri brotalöm sem þyrfti að lagfæra.“

Ögmundur undirstrikar að mjög mikilvægt sé að með öllu sem snúi að símhlerunum og hvers kyns eftirliti með borgurum landsins sé mjög strangt aðhald og eftirlit og um það gildi mjög skýrar reglur.

„Það er ábyrgt af hálfu Símans að vilja taka þetta mál upp. Næsta skref verður einfaldlega að kalla að viðræðuborði alla þá sem hafa þessi mál með höndum hjá Póst- og fjarskiptastofnun, fjarskiptafyrirtækjunum og lögreglu.“

jss@frettabladid.is