Hagfræðingarnir funda með þingnefnd eftir helgi

„Það er verið að kanna hvenær þeir aðilar sem þarna eiga í hlut komast,“ segir Lilja Rafney Magnúsdóttir, þingmaður VG og formaður sjávarútvegs- og landbúnaðarnefndar. Hún á von á því að nefndin komi saman á þriðjudaginn til að ræða um skýrslu hagfræðinga um frumvörp Jóns Bjarnasonar, sjávarútvegs- og landbúnaðarráðherra, um breytingar á stjórn fiskveiða. Verið er að athuga hvort og þá hvenær hagfræðingarnar komast og af þeim sökum hefur ekki verið boðað formlega til fundarins, að sögn Lilju.

Sérfræðingahópur á vegum Jóns sem hann fól að fara yfir frumvörp hans um stjórn fiskveiða, gerir margar og alvarlegar athugasemdir við frumvörpin. Nái þau fram að ganga vinni þau gegn hagræðingu í greininni, geri nýliðun erfiðari og fleira.

Það voru þingmenn stjórnarandstöðunnar í sjávarútvegs- og landbúnaðarnefnd sem óskuðu eftir því að nefndin kæmi saman til fundar og að hagfræðingarnar yrðu þar sérstakir gestir. Lilja segist ekki hafa séð ástæðu til annars en að verða við beiðninni.

„Það var reyndar samkomulag að ósk stjórnarandstöðunnar að það færi ekki fram nein efnisleg umræða um stóra fiskiveiðistjórnunarfrumvarpið í sumar eða á þinginu í september. Það kom því á óvart að þessi ósk kom fram en ég áskil mér fullan rétt til að kalla þá til fleiri aðila fyrst þingmenn stjórnarandstöðunnar í nefndinni opnuðu á málið með þessum hætti,“ segir Lilja.

Sammála Svandísi

Fyrr í dag sagði Svandís Svavarsdóttir, umhverfisráðherra, að breytingar á kvótakerfinu eigi ekki einungis að skoða út frá hagfræði því einnig verði að huga að samfélagslegum breytingum. Lilja tekur undir með Svandísi og segir að skoða verði þessi mál í víðu samhengi. Skýrsla hagfræðinganna sé eitt púslið í allri heildarmyndinni sem þurfi að skoða.

„Hagfræðin stendur fyrir sinn hluta og svo koma aðrir þættir eins og samfélagslegir, byggðarlegir og fleiri sem taka þarf inn í myndina,“ segir Lilja.