Magadansinn kostaði framfærsluna

Framfærsla konu í New York var minnkuð um rúman helming eftir að fyrrverandi eiginmaður hennar sá myndir á netinu af henni að dansa magadans.

Konan fékk 850 dollara mánaðarlega í framfærslu frá eiginmanninum fyrrverandi þar sem hún átti ekki að geta unnið vegna meiðsla sem hún hlaut í bílslysi á miðjum tíunda áratugnum.

Eiginmaðurinn rakst svo á myndaseríu sem sýndi konuna, sem er 43 ára gömul, dansa magadans. Þá skrifaði konan við myndirnar að hún æfði dansinn í margar klukkustundir á dag.

Eiginmaðurinn var allt annað en sáttur og stefndi konunni fyrir dóm í þeim tilgangi að minnka framfærsluna, sem hann hafði áður verið dæmdur til þess að greiða henni mánaðarlega.

Dómarinn tók mið af hinum nýju sönnunargögnum og minnkaði framfærsluna niður í 400 dollara á mánuði. Þá skipti engu sú afsökun konunnar, að magadansinn væri í raun til heilsubótar vegna slyssins.