Nemendur krefjast þess að ráðuneytið hlusti

40 nemendur úr Kvikmyndaskóla Íslands sitja nú fyrir utan skrifstofur menntamálaráðuneytisins. Þeir krefjast þess að ráðuneytið hlusti á skólann og tilboð frá honum.

„Þetta ættu að vera vægast sagt ásættanleg tilboð miðað við aðra skóla úti í heimi," segir Ari Birgir Ágústsson, talsmaður nemenda. Kvikmyndaskóli Íslands hlaut um 278 þúsunda króna fjárveitingu með hverjum nemanda árið 2010, miðað við um 10 milljóna króna framlag Danska kvikmyndaskólans og þess norska. Þessar tölur koma fram á www.stadreyndir.com

Ari segist persónulega tilbúinn til að sitja allt þar til niðurstaða fæst í málið og ríkið semur við skólann. Hann gerir þó fastlega ráð fyrir því að þeim verði hent út fljótlega.

Viðbrögð ráðuneytisins við setumótmælunum voru að bjóða nemendum á fund til að ræða kröfur þeirra. Þeir afþökkuðu fundarboðið. „Við erum ekki að sækjast eftir fundum. Nennum ekki að láta brjóta okkur ennþá meira niður," segir Ari.

Í samtali við fréttastofu benti Ari ítrekað á að nú séu 38 nemendur Kvikmyndaskólans komnir á atvinnuleysisbætur. Það kosti ríkið töluvert meira en skólin þarf til að halda rekstrinum gangandi. Ríkið hafi nú milli þessara kosta tveggja að velja. „Það er mjög skrítið að ráðuneytið segist ekki hafa fjármagn til að verða við kröfum skólans en geti engu að síður haft okkur öll á atvinnuleysisbótum," segir Ari.

Aðspurður veit hann ekki hvort nemendurnir muni snúa aftur á morgun. „Það hefur ekkert verið ákveðið um það. En við munum halda áfram að gera eitthvað."